Vieiros

Os Comités Abertos de Escola e Faculdade, organización maioritaria do estudantado galego nas tres Universidades Galegas e a única con representación nos sete campus, está a desenvolver unha campaña sobre o Espazo Europeo de Educación Superior, a nosa organización xa dende o ano 2003 vímonos posicionando contra a Declaración de Boloña e o seu desenvolvemento no Estado Español e na Galiza. Polo que supón de destrución do servizo público de ensino superior e o que supón de ameaza para un país como Galiza con un sistema universitario tan feble. A progresiva adaptación do noso sistema universitario ao Espazo Europeo de Educación Superior explica moitos dos problemas que os estudantes universitarios estamos a ter a día de hoxe.

A suba continua do prezo das taxas académicas. Todos os anos observamos como aumenta o prezo da nosa nosa matrícula: na década pasada as taxas subiron unha media do 4% e no último ano un 5%. Non é unha suba arbitraria xa que sempre sobe por riba do IPC provocando unha segunda selectividade, desta volta, económica; ou sexa, provoca que non todo o mundo poida ter acceso a un servizo público de ensino superior.

A obrigatoriedade de asistir ás aulas. Este deber xorde da idea de que os estudantes temos de ser profesionais do estudo, é dicir, estudantes a tempo completo. O sistema ECTS estabelece isto con horas de aulas presenciais, horas de estudo, horas de traballos e prácticas, horas de titorías e impide deste xeito que nos poidamos pagar os nosos estudos traballando durante o curso, ou mesmo comezar a nosa carreira profesional antes de rematar a titulación.

Bolsas ou créditos bancarios? A importancia da política de bolsas diminúe fronte aos créditos chamados brandos, que ofrecen algunhas entidades bancarias e que teñen de ser devoltos a estas cando cobrares do teu primeiro emprego, e a maioría dos primeiros empregos son en precario. Deste xeito, só cursariamos carreiras coas que puidesemos amortizar rapidamente este endebedamento.

A importancia dos mestrados e posgraos. Os estudos de posgrao e mestrados oficiais, a parte de seren moito máis caros e con menos prazas que os graos, son necesarios para garantir unha mínima inserción laboral e son consecuencia da implantación dos novos títulos.

En resumo. Imos ter que estudar durante máis anos pola necesidade de cursar posgraos e mestrados, a costes máis altos debido ás taxas, e o prezo destes, teremos que estudar a tempo completo e endebedándonos até atopar un traballo co que devolvermos o crédito de estudo.Mais isto non é imparábel. Se defendemos a universidade pública, garantimos o financiamento público das universidades galegas, paramos a suba das taxas, asumimos as competencias en política de bolsas, regulamos os mestrados e posgraos... estaremos parando Boloña.