Vieiros

A axencia de cualificación Standard & Poor's anunciou que reduciu en dous puntos o 'rating' da República portuguesa, do A+ ao A-. Así mesmo, revisou a cualificación a longo prazo nun punto, de A até A-, mentres que o de curto prazo reduciuno de A-1 a A-2.

Segundo o informe de Standard & Poor's, recollido polo xornal Público, a revisión á baixa xustifícase nas "fraquezas estruturais económicas e fiscais" que deixan Portugal "nunha posición fráxil para lidar coa deterioración significativa das súas finanzas públicas e as perspectivas de crecemento económico tenues no medio prazo".

Tamén a perspectiva futura se mantén negativa, polo que o 'rating' podería descender máis a curto prazo, entre seis meses e dous anos. Segundo S&P, poderíase dar un novo descenso se o esforzo de consolidación fiscal se mantén por debaixo das expectativas ou se aumentan as preocupacións sobre a liquidez do Estado Portugués.