Vieiros

A Consellaría de Cultura e Turismo anunciou que financiará o proceso de limpeza, acondicionamento e levantamento topográfico do Castro de Baroña, no concello de Porto do Son. O xacemento sufrira un acto vandálico a pasada fin de semana, cando persoas descoñecidas sacaron 300 pedras dos muros do castro para amorealas en forma de pirámides, vulnerando a Lei de Patrimonio.

Os traballos consistirán na limpeza e acondicionamento do castro e na instalación de carteis informativos para "concienciar a cidadanía da importancia deste elemento arqueolóxico", explicou o director xeral de Patrimonio Cultural, Xosé Manuel Rey Pichel. Cultura tamén colaborará en elaborar un Plan Director que regule as actuacións na zona. Pola súa banda, o concello de Porto do Son está a redactar un Plan Especial de Protección de cara á súa declaración como Ben de Interese Cultural.